Høyring frå EBA: Endringar i utfyllande reglar til kapitalkravforordninga (CRR) om forsvarleg verdsetting som gjeld for bankar m.fl.

CRR artikkel 105 regulerer forsvarleg verdsetting av finansielle instrument og varer som er verdsette til verkeleg verdi, og føresegna omfattar både posisjonar i bank- og handelsporteføljen. Delegert kommisjonsforordning (EU) 2016/101, som endra ved delegert kommisjonsforordning (EU) 2020/866, gir utfyllande reglar til føresegna. Den forsvarlege verdien er verdien, der føretaka er 90 prosent sikre på at posisjonen kan avsluttast basert på gjeldande marknadsforhold på vurderingstidspunktet. Når bruk av forsvarleg verdsetting resulterer i ein lågare verdi for eigedelar eller ein høgare verdi for forpliktingar enn det som kjem fram av rekneskapen, skal ei ekstra verdijustering (AVA) bereknast som absoluttverdien av differansen mellom dei to. Det følger av CRR artikkel 34 i CRR at AVA skal komme til frådrag i rein kjernekapital. Dei nemnde forordningane er gjennomførte i norsk rett ved innlemming i CRR/CRD IV-forskrifta § 2 andre ledd nr. 5. EBA foreslår i høyringa endringar i dei utfyllande reglane for å sørge for ein meir lik bruk av krava og redusere den observerte variasjonen av AVA berekna etter kjernemetoden, og dessutan fastsette reglar for bruk av rammeverket ved ekstraordinære omstende.

Det er grunn til å tru at endra reglar blir tekne inn i EØS-avtalen og gjennomførte i norsk rett i CRR/CRD IV-forskrifta. Finanstilsynet ber om å bli informert dersom det er forhold av særleg tydning for norske interesser som Finanstilsynet bør vere merksam på. Det vil i utgangspunktet ikkje bli gjennomført ny høyring når regelverket skal takast inn i norsk rett.

Høyringsfristen er 16. april 2024. EBA arranger ei offentleg høyring i form av eit webinar 4. mars 2024 kl. 14.00 - 16.00.

Nærmare informasjon om høyringa og høyringsnotatet på EBAs nettstad:

• EBA consults on targeted amendments to the prudent valuation framework (EBA/CP/2024/001)