Høyring frå ESMA: Tekniske standardar for eksterne kontrollørar av europeiske grøne obligasjonar

EuGB-forordninga tredde i kraft i EU 20. desember 2023, med bruk frå 21. desember 2024. Forordninga er til vurdering for innlemming i EØS-avtalen. 

Forordninga pålegg ESMA å utarbeide tekniske standardar for eksterne kontrollørar av grøne obligasjonar. Dei foreslåtte standardane leveres i to pakkar, der den første høyringa vart avslutta i februar 2025. Dette andre og siste høyringsdokumentet omfattar fem forslag til regulatoriske tekniske standardar (RTS) og éin teknisk standard for gjennomføringa (ITS), og gjeld følgjande område: 

• Organisering og ressursar: Kriterium for vurdering av om systema, ressursane og prosedyrane til kontrolløren er formålstenlege, tilstrekkelege og effektive for å sikre etterleving av regelverket.
• Compliance-funksjonen: Kriterium for vurdering av om compliance-funksjonen har styresmakt til å vareta sitt ansvar på ein forsvarleg og uavhengig måte, og dessutan nødvendige ressursar, ekspertise og tilgang til relevant informasjon. 
• Prosedyrar og internkontroll: Kriterium for vurdering av om dei administrative og rekneskapsmessige prosedyrane til kontrolløren, interne kontrollsystem og tiltak for vern og tryggleik i informasjonssystem er forsvarlege og effektive.
• Informasjonskvalitet: Kriterium for vurdering av om informasjon nytta i kontrollen held tilstrekkeleg kvalitet og stammar frå pålitelege kjelder.
• Søknadskrav: Krav til innhald og format for søknader om godkjenning som ekstern kontrollør.
• Varsling av vesentleg endring: Standardiserte skjema, malar og prosedyrar for varsling av vesentlege endringar i opplysningar gitt ved registrering.

Høyringa er open for alle interesserte. ESMA oppmodar særleg aktørar som skal søkje om registrering som eksterne kontrollørar, og dessutan utferdarar og investorar i grøne eller berekraftsrelaterte obligasjonar, til å delta. ESMA vil vurdere eventuelle innspel før endeleg rapport blir publisert og standardane blir sende over til Europakommisjonen innan 21. desember 2025.

Høyringsfristen er 30. mai 2025.

Høyringsnotatet og meir informasjon er tilgjengeleg på nettstaden til ESMA:

• ESMA consults on rules for external reviewers of European Green Bonds