Ny lov om Finanstilsynet trer i kraft 1. april 2025

Samfunnsoppdraget til Finanstilsynet om å bidra til finansiell stabilitet og velfungerande marknader er ei ny formålsføresegn i lova. Finanstilsynet skal framleis føre eit heilskapeleg tilsyn i den finansielle sektoren, på tvers av føretakstypar og marknader.

Etter føresegnene i den nye lova overtar Finanstilsynet oppgåver frå Oslo Børs med verknad frå 1. april 2025. Dette omfattar tilsynet med reglane om løpande informasjonsplikt og utsett offentleggjering av innsideinformasjon, tilsynet med tilbakekjøp av aksjar og stabilisering, og oppgåva som tilbodsmyndigheit.

Det blir oppretta ei ny klagenemnd, Finanstilsynsklagenemnda, som vil behandle klager på enkeltvedtak som er fatta av Finanstilsynet. Finanstilsynsklagenemnda blir ein del av Klagenemndssekretariatet i Bergen.

Lova stiller klare krav om habilitet og uavhengigheit for medlemmene i styret og dei tilsette i Finanstilsynet. Den nye lova fastset vidare at det er avgrensa rett for Finansdepartementet til å instruere Finanstilsynet.

Den gamle lova, lov 7. desember 1956 nr. 1 om tilsynet med finansforetak mv., blir oppheva når den nye lova, lov 21. juni 2024 nr. 41 om Finanstilsynet, trer i kraft.

Finansdepartementet fastsette 27. mars 2025 forskrift til finanstilsynsloven med utfyllande føresegner til lova. Finanstilsynsforskrifta trer i kraft samtidig som lova.